Bil eller båt til reparasjon eller service i utlandet

Dersom du sjølv reiser med bilen eller båten din gjeld verdigrensa for reisande. Verdigrensa er på 3 000 eller 6 000 kroner avhengig av kor lenge du har vore ute av landet. Dersom verdien på reparasjonen/servicen er over verdigrensa, må du betale meirverdiavgift (mva) på 25 prosent av heile kostnaden for reparasjonen og ev. fraktkostnadar.

• merverdiavgifsloven § 4-11 fjerde ledd
• tollavgiftsloven § 3-4

Meir om mellombels ut- og innførsel i samband med reparasjonen

Det er ikkje noko krav frå Tolletaten i Noreg at du registrerer ein mellombels utførsel på bilen eller båten din når du køyrer den ut av landet sjølv eller fraktar ein norskregistrert bil eller båt på hengar (skilta sit på bilen). Du bør likevel undersøkje med tollmyndigheitene i det landet der du skal utføre reparasjonen/servicen om du treng ein mellombels utførselsdeklarasjon frå Noreg. Då må du møte ved eit lokalt tollkontor som vil skrive ut denne til deg utan kostnad. Fraktar du ein uregistrert (tidligare norsk registrert) bil på hengar, må du få laga ein utførselsdeklarasjon.

Prosedyre for innførsel til reparasjonsland

Du må også undersøkje med tollmyndigheitene i landet der du skal utføre reparasjonen/servicen om kva for prosedyrar du skal følgje når du passerer den norske grensa. Det kan til dømes vere slik at du ved innførsel må stille depositum for meirverdiavgift med grunnlag i verdien på bilen eller båten.

Gjeninnførsel av bil eller båt til Noreg

Når du skal gjeninnføre bilen eller båten, må du igjen undersøkje med tollmyndigheitene i landet der bilen eller båten er reparert/hatt service om kva for prosedyrar du må følgje ved gjenutførselen der.

Unntak frå meirverdiavgift ved gjeninnførsel

Ved gjeninnførselen til Noreg, slepp du å betale mva. dersom reparasjons- og servicekostnadane og verdien av ev. andre varer du har handla ikkje overstig verdigrensa du har som reisande.

Tollbehandling på raud Sone ved overstigande verdi

Overstig reparasjons- og servicekostnadane verdigrensa, pliktar du å stoppe på raud sone for tollbehandling. Du må betale 25 % meirverdiavgift. av heile beløpet, inkludert ev. fraktkostnadar med meir.

Profesjonell transport av bil eller båt

Dersom du nyttar ein profesjonell transportør til å frakte bilen eller båten din, skal denne kjenne tollprosedyrane.

Refusjon/tilbakebetaling

Mogeleg refusjon/tilbakebetaling av utanlandske avgifter (som til dømes meirverdiavgift), må du ta direkte med verkstaden. Dette er ikkje noko Tolletaten kan hjelpe deg med.